Аԥсны Аҳәынҭқарра акультура аминистр Гәдиса Агрба ииубилеи идиныҳәалеит актиор, асценарист, ақәыргылаҩ, «Ахьӡ-Аԥша» аорден III аҩаӡара занашьоу, Аԥсны зҽаԥсазтәыз артист Роман Сабуа.
Адныҳәалараҿы иаҳәоит:
«Ҳаҭыр зқәу Роман Илиа-иԥа!
Аԥсны Аҳәынҭқарра Акультура Аминистрра ахьӡала гәык-ԥсыкала ишәыдысныҳәалоит шәиубилеи — 65 шықәса шәхыҵра.
Шәара С. Ҷанба ихьӡ зху Аԥсуа ҳәынҭқарратә драматә театр инарылукааша актиорцәа шәреиуоуп. Аԥсуа театр иреиӷьу аспектакльқәа рҟны ихадоу арольқәа нашәыгӡоит. XX ашәышықәса анҵәамҭеи XXI ашәышықәса алагамҭеи иаҵанакуа аамҭахҵәахазы урҭ аспектакльқәа аԥсуа театртә ҟазара аҿиараҟны хаз етапны иҟалеит.
Ганралацәа иҭбаау шәбаҩхатәра, хымԥада, атеатртә ҟазара арбеиоит, ирацәоуп шәлагала аԥсуа культуреи адоуҳатә ҭынхеи рыхьчаразы иҟашәҵахьоу.
Гәык-ԥсыкала ишәзеиӷьаҳшьоит ҩаԥхьагьы ақәҿиара дуқәа, иухамышҭуа арольқәа аԥсуа сценаҟны, агәабзиара, ашықәсынҵыра рацәа!».