Жәабранмзазы Шәача имҩаԥысраны иҟоу XIII Аӡынтәи жәларбжьаратәи аҟазара афестиваль иалахәхоит Аԥснытәи аҳәынҭқарратә хортә капелла. Уи анапхгаҩы Нора Џьынџьалԥҳа арадио Sputnik Аԥсны аефир аҿы еиҭалҳәеит аҽазыҟаҵарақәа шцо атәы.
"Ҳшымгәыӷӡоз ахортә опера ҳалахәхарцаз ааԥхьара ҳарҭеит, аамҭа зынӡа имаҷӡаны иҳамоуп. Ахы инаркны аҵыхәанӡа аопера ахор ауп изҳәо, ҳара ҳхала заҵәык ҳакәым, ирацәоуп ахорқәа иҳацықәгыло. Урҭ - Москватәи ахортә капелла, Иарославльтәи ахор, Жәлар рхор уҳәа ҳаргьы убрахь ҳналаҵаны сценак аҿы ҳаицықәгылоит. Инаҳагӡо Александр Чаиковски иаԥҵамҭа "Сказ о Борисе и Глебе" ауп. Ажәеизатәи ашәышықәса иаҵанакуа аҳәамҭа иааганы иҳарҭеит, ҳаҿуп иахьынӡаҳалшо аҽазыҟаҵара. Аамҭа маҷны иҳамоуп, ишахәҭаҵәҟьоу иҟалоит ҳәа аҳәара даара иуадаҩуп, аха ахорқәа ахьеилагылахо ҳрыҵахап ҳәа сгәы иаанагом", - ҳәа еиҭалҳәеит Џьынџьалԥҳа.
Инеиҵыху аиҿцәажәара шәазыӡырҩы арадио Sputnik Аԥсны аефир аҿы.