Аԥсны Аҳәынҭқарра Акультура Аминистрра ииубилеи идырныҳәалоит Аԥсны аҟазара зҽаԥсазтәыз, «Ахьӡ-Аԥша» аорден III аҩаӡара занашьоу, аҵарауаҩ-афольклорҭҵааҩы, амузикант, ахормеистер Иван Сафар-иԥа Шамба.
Иван Сафар-иԥа акыр шықәса Аҳәынҭқарратә жәлар рышәаҳәареи рыкәашареи рансамбль аҟны дирижиорс аус иуан, ансамбль «Риҵа» аҟны асахьаркыратә напхгаҩыс дыҟан, С. Ҷанба ихьӡ зху Аԥсуа ҳәынҭқарратә драматә театр аҟны иаԥиҵеит ансамбль «Уарада». Аԥсны Аџьынџьтәылатә еибашьраан напхгара азиуан акультуреи аҟазареи русзуҩцәа рыла Гәымсҭатәи ахырӷәӷәарҭаҟны еиҿкааз агәыԥ.
Ирацәоуп Иван Сафар-иԥа иџьабаа аԥсуа етнограиатә материалқәа реизгареи афольклортә музика аҭҵаареи аиқәырхареи аус аҟны.
Аԥсны Аҳәынҭқарра Акультура аминистрра гәык-ԥсыкала изеиӷьаршьоит агәабзиара еиҿамс, аманшәалара, ақәҿиара дуқәа!