«Ҳаҭыр зқәу Борис Шьаликәа-иԥа!
Акультура Аминистрра ахьӡала гәык-ԥсыкала ишәыдысныҳәалоит напхгара ззыжәуа И. Папасқьыр ихьӡ зху Амилаҭтә шәҟәыԥхьарҭа 100 шықәса ахыҵра.
100 шықәса – ашәҟәыԥхьарҭа аҭоурых азы ари ҿҳәара маҷым. Ари аамҭа иалагӡаны ашәҟәыԥхьарҭа алагала рацәаны иҟанаҵеит акультуреи, аҭҵаарадырреи, аҵарадырреи рырҿиарарзы, имаҷым алшара аԥсуа жәлар ркультуратә ҭынха ахьчареи аихырҿиареи аус аҟны, имҩаԥнагоит азҿлымҳара зцу апрограммақәеи апроектқәеи. Ари зегь зыбзоуроу шәара напхгара ззыжәуа ашәҟәыԥхьарҭа аусуцәа рус ҭакԥхықәрала, ҟазарыла иахьазнеиуа ауп.
И. Папасқьыр ихьӡ зху Амилаҭтә шәҟәыԥхьарҭа – аҭоурых ду змоу акультуратә хәшҭаароуп, ианакәзаалак уи ажәлар рдоуҳатә ԥсҭазаараҿы акыр зҵазкуа аҭыԥ ааннакылоит. Аԥсны жәлар рџьынџьтәылатә еибашьраан ашәҟәыԥхьарҭа ааха ду арҭеит, ақырҭуа мпыҵахалаҩцәа аԥсуа ҭоурыхи акультуреи рыӡбахә зҳәо зегьы аԥырхырц ргәы иҭан. Аибашьра ашьҭахь шәара ишәылшо зегь ҟашәҵеит ашәҟәыԥхьарҭа фонд аиҭашьақәыргылараз. Иахьатәи ҳаамҭаз И. Папасқьыр ихьӡ зху Амилаҭтә шәҟәыԥхьарҭа культуратә, аинформациатә, арккаратә хәшҭаароуп, ҳҳәынҭқарра ауаажәларратә ԥсҭазаара иалахәуп.
Гәык-ԥсыкала И. Папасқьыр ихьӡ зху Амилаҭтә шәҟәыԥхьарҭа аколлектив ирыдысныҳәалоит 100-шықәсатәи аиубилеи. Ишәзеиӷьасшьоит ақәҿиарақәа, аманшәалара, азҿлымҳара зцу апроект ҿыцқәа, ашәҟәыԥхьарҭа аҿиаразы шәыгәҭакқәа аԥсҭазаара раларҵәаразы алшара шәоуааит!».
