Аԥсны Аҳәынҭқарра акультура аминистр Гәдиса Агрба Аԥсуа ҳәынҭқарратә музеи адиректор, аҵарауаҩ-археолог, аҭоурыхтә наукақәа ркандидат Аркади Иуан-иԥа Џьопуа ииубилеи идиныҳәалеит!
Адныҳәалараҿы иаҳәоит:
«Ҳаҭыр зқәу Аркади Иуан-иԥа!
Аԥсны Аҳәынҭқарра Акультура Аминистрра ахьӡала ишәыдысныҳәалоит шәирамш! Шәыԥсҭазаара зегьы азкуп ахықәкы ҳаракы – хәы змаӡам Аԥсны акультуратә, адоуҳатә ҭынха ахьчара. Атеориатә, апрактикатә ԥышәа ду змоу аҵарауаҩ, шәара хаҭала шәрылахәуп археологиатә експедиациақәа.
Даара иҭбаауп шәыҭҵаарақәа рымҽхак – Мрагыларатәи Понт аџьазтә, заатәи аихатә шәышықәсақәа рзтәи аҭоурых апроблемақәа. Шәара шәравторуп 60 инареиҳаны аҭҵааратә статиақәеи 50 статиақәеи апериодикатә кьыԥхь аҟны. Шәусумҭақәа ҭыжьуп аԥсуа, аурыс, англыз бызшәақәа рыла.
Акыр шықәса инеиԥынкыланы шәара ҭакԥхықәрала напхгара азыжәуеит Аԥсуа ҳәынҭқарратә музеи – ҳажәлар рдоуҳатә ҭынха ахьеизгоу.
Иҭабуп ҳәа шәаҳҳәоит ҳҭоурыхтә-культуратә ҭынха аҭҵаареи аиқәырхареи рзы иҟашәҵахьоу шәлагалазы.
Гәыкала ишәзеиӷьаҳшьоит агәабзиара, аманшәалара, ашықәснҵыра рацәа, иара убас азҿлымҳара зцу аҭҵаарақәа!».