Ииуль 7 рзы Аԥсны Аҳәынҭқарра акультура аминистр Гәдиса Агрбеи аминистр ихаҭыԥуаҩ Смырԥҳа Динареи Ф. Искандер ихьӡ зху Аҳәынҭқарратә аурыс драматә театр иаҭааит, аусбарҭа аусура ҭырҵаарц азы.
«Акультура Аминистрра хықәкы хадас иамоу аусуразы аҭагылазаашьа бзиақәа раԥҵара ауп, аха анапхгаҩцәагьы аҭакԥхықәра хаҭала ишрыду рныруазароуп. Сара аиҩызара даара пату сзақәуп, агәра ганы сыҟоуп, ҩызаҵас сшәывагылап ҳәа. Лассы-лассы шәтеатр аҭаара агәаҳәара сымоуп. Иарбан театрзаалак ақәҿиарақәа зыбзоуроу аҟазаратә коллектив ауп. Сара излазбо ала, шәактиорцәа гәыкала аусура иазыҟоуп, уи даара ибзиоуп аус азы. Ҳара ҳганахь ала шәара шәышҟа зҵаара ҳамам, уи азы ҳгәы ҭынчуп», – азгәеиҭеит акультура аминистр аиԥылараан.