«Гәалсра дула иҳадаҳкылеит Платон Бебиа иԥсҭазаара иалҵра.

Аԥсны жәлар рпоет, апрозаик, апублицист, арккаҩы, ирацәоуп Платон Бебиа аԥсуа литератураҟны иҟаиҵаз алагала. Уи дравторуп 35 шәҟәы. Платон Бебиа дырдыруеит иара убас еиҭагаҩык иаҳасабала, аԥсышәала ирцәажәеит адунеи еицырдыруа ашәҟәыҩҩцәа – А.С. Пушкин, Р. Биорнс, С.А. Есенин, Г. Лорка, Н. Ҳиқьмеҭ, Л. Украинка, С.В. Михалков, Е.А. Евтушенко, Б.М. Пачев, Б.Г. Кагермазов, Ҟ. Ш. Кулиев, Ш.С. Акобиа, Џь. Ҟ. Лаҩыцә, Ч. Т. Аитматов.

Иҩымҭақәа рнылон еиуеиҧшым аколлективтә еизгақәа, ажурналқәа «Алашара», «Амцабз», «Звезда», «Наш современник», «Молодая гвардия»; агазеҭқәа «Аҧсны ҟаҧшь», «Аҧсны», «Бзыҧ», «Еҵәаџьаа», «Советская Абхазия», «Литературная газета», «Литературная Абхазия», алитературатә еизга «Ерцахә» уҳәа егьырҭгьы.

Платон Бебиа игәалашәара лаша наунагӡа ҳгәаҿы иаанхоит».

86 шықәса дшырҭагылаз иԥсҭазаара далҵит Аԥсны жәлар рпоет, апрозаик, апублицист, аиҭагаҩ, СССР-и, Аԥсни, Урыстәылеи Ашәҟәыҩҩцәа Реидгылақәа рылахәыла, Аԥсны акультура зҽаԥсазтәыз аусзуҩ, Д. Гәлиа ихьӡ зху Аҳәынҭқарратә премиа алауреат, «Ахьӡ-Аԥша» аорден III аҩаӡара занашьоу Платон Хәамԥа-иԥа Бебиа.