Аконцерт апрограмма шьақәгылан еицырдыруа аромансқәеи ариақәеи рыла. Инаигӡон атеатр асахьаркыратә напхгаҩы, Урыстәыла зҽаԥсазтәыз артист, Башкортостан жәлар рартист Аскар Абдразаков.
«Ари илашԥхкыгоу, енергетика бзиа змоу залуп, араҟа ашәа умҳәар залшом, избанзар араҟа уԥсы, угәаҭа ашәа рҳәоит. Ҳара Аԥсны аанҳажьуеит ҳагәқәа џьшьарала иҭәны. Араҟа аконцерт амҩаԥгара – ҭоурых хҭысуп. Сгәыӷуеит, ас еиԥш иҟоу ахҭысқәа традицианы иҟалап ҳәа, насгьы ҳажәларқәа рыбжьара аимадара аҽарӷәӷәап, лассы-лассы ҳаиҭанеиааилап ҳәа агәра згоит», – аконцерт ашьҭахь иҳәеит Аскар Абдразаков.
Аконцерттә хор инанагӡеит апрограмма «…О вечном», уи иахәҭакын Алеқсандр Гречанинов иҩымҭа «Литургия Святого Иоанна Златоуста» (№ 2, арҿ. 29) аҟынтәи аномерқәа, ҳаамҭазтәи молдавиатәи акомпозитор Владимир Чолак иаԥҵамҭа «Месса».
Ауарӷан апартиа наигӡон Аԥснытәи аҳәынҭқарратә филармониа асолист, жәларбжьаратәи аконкурсқәа рлауреат, Аԥсны зҽаԥсазтәыз артист Лука Гаделиа. Аконцерт далахәын Р. Гәымба ихьӡ зху Аԥснытәи аҳәынҭқарратә филармониа асолист Кристина Ешԥҳа.
Апроект мҩаԥысит Аԥсны Аҳәынҭқарра Акультура Аминистрра ацхыраарала.