Аҟәатәи амузыкатә ҵараиурҭаҿы Алиса Гыцԥҳа авокал азы рҵаҩыс длыман еицырдыруаз арҵаҩы Жозефина Бумбуриди. 1989 шықәсазы лара аҵараиурҭа далгеит "Амузыкаа атеориа" акласс ала, дагьҭалеит Гнесинаа рыхьӡ зху Урыстәылатәи амузыкатә академиа, "Асолотә академиатә шәаҳәара" акласс ала, апрофессор Шильникова лҟны.
1993 шықәсазы Москватәи атеатр атруппа "Геликон-опера" дадкылоуп, иахьа уажәраанӡа аус луеит уаҟа. Алиса Гыцԥҳа илҳәоит ахааназы дызхьымхуа шьаҿаны ишыҟоу "Геликон-опера" азыӡырҩра дахьаҭааз. Ашәаҳәаҩ араҟа иналыгӡахьеит 30 инарзынаԥшуа арольқәа. Иаҳҳәап: Аида ("Аида" Дж. Верди), Виолетта ("Травиата" Дж. Верди), Леди Макбет ("Макбет" Дж. Верди), Лиза ("Пиковая дама" П.Чайковский), Татьяна ("Евгений Онегин" П.Чайковский), Эмилия Марти ("Средство Макропулоса" Л.Яначек), Она ("Человеческий голос" Ф.Пуленк), Мадам Лидуан ("Диалоги кармелиток" Ф.Пуленк), Розалинда ("Летучая мышь" И.Штраус), Недда ("Паяцы" Р.Леонкавалло), Антония ("Сказки Гофмана" Ж.Оффенбаха).
"Усҟан исхыҵуан 22 шықәса, зынӡа сқәыԥшын. Аоператә театр ашьаҭа акра иаамҭан, азал маҷын, асолистцәа рхыԥхьаӡара рацәамызт. Иахьазы атеатр еизҳаит, атехника аганахьала, асолистцәа рхыԥхьаӡара акыр иацлеит, аԥеиԥш бзиа азыҟалеит. Араҟа инасыгӡахьеит имаҷымкәан арольқәа", - ҳәа азгәалҭоит Алиса Гыцԥҳа.
Алиса Гыцԥҳа иналыгӡахьоу лрольқәа рҟынтә реиҳа иалылкаауа ҳәа акгьы ыҟаӡам, избанзар урҭ зегьы гәыкала дырзыҟоуп, лхы-лыԥсы азышьҭны иналыгӡоит.
"Иарбан қәгылароу еиҳа иалыскаауа, исзааигәоу ҳәа шәсазҵаауазар, аҭак сзыҟамҵар ҟалап. Асценахь уцәырҵцыҧхьаӡа аҵыхәтәантәи уцәырҵра акәушәа уроль наугӡароуп. Избанзар, аҭакԥхықәра ду ужәҩахыр иқәуп. Ақәыргылаҩ ахәаԥшцәа ирызнеигарц ииҭахыз ахшыҩҵак аӡыргара зуалу артист иоуп. Ҳәарада, уи ашәарагьы агәыхыҭ-хыҭрагьы ацуп", - ҳәа азгәалҭоит Алиса Гыцԥҳа.
Ашәаҳәаҩ лрепертуар иалоуп акамертә музыка аҿырԥштәқәа маҷымкәа: еицырдыруа аурыс, аҳәаанырцәтәи акомпозиторцәа рашәақәеи рромансқәеи – Глинка, Мусоргски, Рахманинов, Шуберт, Шуман, Брамс, Лист, Дебиусси, Равель уҳәа убас ирацәаҩны. Алиса Гыцԥҳа еиуеиԥшым ахырхарҭақәа рҟын лхы ԥылшәахьеит – абарокко инаркны аҩажәатәи ашәышықәса авангардтә музыка аҟынӡа.
Алиса Гыцԥҳа ишазгәалҭо ала, ақәыргылаҩ апиеса рҿыцны, аԥсы ахаҵаны ианааирԥш, актиорцәа уи анырзынагӡа, убасҟан ауп анапеинҟьабжьҵәҟьа азал ианыҩныҩуа.
Алиса Гыцԥҳа дпатриот дууп. Акыршықәса Урыстәыла дшынхогьы, лхәыцрақәа зегьы лыҧсадгьыл иадҳәалоуп. Алиса Гыцԥҳа лҭаацәараҿы ирызҳауеит амузыкатә баҩхатәра змоу аԥеи аԥҳаи, лыԥшәма – амузыкант игәаанагарагьы аҵак ҷыда амоуп.
