Адныҳәалараҿы иаҳәоит:
«Ҳаҭыр зқәу Алеко Алықьса-иԥа!
Аԥснытәии Урыстәылатәии анаукақәа ракадемиақәа рлахәыла, М. В. Ломоносов ихьӡ зху Москватәи аҳәынҭқарратә университет ҳаҭыр зқәу апрофессор, Оксфордтәи академиатә хеидкыла алахәыла, еицырдыруа аԥсуа математик, знаукатә усумҭақәа жәларбжьара азхаҵара зауз, шәара акыр шықәса инеиԥынкыланы напхгара азыжәуеит Аԥсуа ҳәынҭқарратә университет – зыквалификациа ҳараку аспециалистцәа ахьазыҟарҵо ҳреспублика иреиҳау аҵараиурҭа ахәшҭаара.
Шәџьабаақәа ирыбзоураны Аԥсуа ҳәынҭқарратә университет Евразиатәи ауниверситетқәа рассоциаициа иахыԥхьаӡалоуп, рыҽдырҭбаауеит ауниверситет жәларбжьаратәи аимадарақәа.
Анаукатә усура анаҩсгьы, шәара активла шәалахәуп ҳреспублика аполитикатә, ауаажәларратә ԥсҭазаара, акырынтә Жәлар реизара – Апарламент ахь депутатс шәалхын.
Шәирамш шәыдныҳәало, ишәзеиӷьасшьарц сҭахуп агәабзиара, ашықәснҵыра рацәа, аԥсуа наука ҩаԥхьагьы амаҵ азуразы шәымч-шәылша еизҳааит!»