Ԥхынгәы 28 рзы акультура аминистр Гәдиса Агрба хантәаҩра ззиуа абаҟақәа апроектқәа иреиӷьу ралхразы иаарту жәларбжьаратәи аиндаҭларақәа рымҩаԥгаразы амонументалтә комиссиа аусуратә гәыԥ ахаҭарнакцәеи Аҟәа ақалақь ахада Беслан Ешбеи иаҭааит Ахақәиҭра Ашҭеи С. Багаԥшь ихьӡ зху Ашҭеи.

Ахақәиҭра Ашҭаҿ иазԥхьагәаҭоуп Аԥсны Аҳәынҭқарра раԥхьатәи Ахада Владислав Арӡынба ибаҟа аргылара, С. Багаԥшь ихьӡ зху ашҭаҿы – аҩбатәи Ахада Сергеи Багаԥшь ибаҟа.

Акультура аминистр, Аҟәа ахада, акомиссиа алахәылацәа ирылацәажәеит абаҟақәа рыргылареи ашҭақәа рырԥшӡареи ирыдҳәалоу аиҿкааратә зҵаарақәа жәпакы.

Акультура аминистр иазгәеҭеит: «Ҳара иҭкааны иаҳдыруазароуп иаҳҭаху. Иҟалап, иаҭаххар адгьыл аҵаҟатәи акоммуникациақәа реиҿкаара, аҭыԥқәа рфотоҭыхымҭақәа, рыхсаалақәа рыҟаҵара. Багаԥшь ибаҟа хаҭала иахьдыргыло аҭыԥ алхтәуп. Аиндаҭлара иалахәу иҳадыргалоит рхатәы проектқәа, рхатәы вариантқәа. Аха уи аамҭазы ҳара ҳазгәаҭарақәагьы ирызхьаԥшруп. Иаагозар, ашҭа агәҭа абаҟа аргылара залшом, избанзар ақалақь ахадара аӡбарала ашҭа агәҭаны иргылахоит аӡыршә».

Ақалақь Аҟәа ахада Беслан Ешба агәра диргеит ақалақь ахадара ахәҭакахь ала зегь рыла ацхыраара шыҟарҵо.

«Аҭыхра ҿыцқәа рыҟаҵара ацхыраара шәаҳҭоит, избанзар С. Багаԥшь ихьӡ зху ашҭаҿы аԥсахрақәа ҟалахьеит. Ашҭа агәҭаны ааигәа иргылахоит аӡыршә. Ҳаргьы ҳгәы иаанагоит, абаҟа ашҭа агәҭаны аргылара залшом ҳәа. Аха аӡбара здызкыло амонументалтә комиссиа акәхоит», – иазгәеиҭеит Б. Ешба.