Аԥсны Аҳәынҭқарра Акультура Аминистрра ахьӡала ииубилеи идаҳныҳәалоит Аԥсны Аҭҵаарадыррақәа ракадемиа ахада, аҵарауаҩ-афольклорҭҵааҩы, афилологиатә ҭҵаарадыррақәа рдоқтор, апрофессор, академик Зураб Џьота-иԥа Џьапуа.
Зураб Џьота-иԥа иҭҵаарадырратә, ирҵаҩратә усура зегьы рыдҳәалоуп Д. Гәлиа ихьӡ зху Агуманитартә ҭҵаарақәа Аԥснытәи ринститути Аԥсуа ҳәынҭқарратә университети.
Зураб Џьапуа иаԥшьгаралеи инапхгаралеи 1991 шықәсазы аинститут аҟны иаатуеит аԥсуа фольклор аҭҵааразы алабораториа, иаԥҵахоит аҭагылазаашьа афольклортә архив ахарҭәаареи аиқәырхареи рзы. 2011 шықәсазы Аԥснытәи аҳәынҭқарратә университет аҟны иааиртуеит Нарҭҭҵаареи афольклористикеи рцентр.
Акырӡа ирацәоуп Зураб Џьота-иԥа илагала аепос, амифологиа, аепикатә ҳәамҭақәа, афольклор атеқстологиа, алиретаруа рыҭҵаараҟны.
Ииубилеи идныҳәало, Зураб Џьота-иԥа изеиӷьаҳшьоит агәабзиара еиҿамс, аманшәалара, ҩаԥхьагьы аҭҵаарадырратә аартра дуқәа. Аԥсуа наука шәагымзааит!