Иахьа иԥсы ҭазҭгьы, Сергеи Уасил-иԥа Багаԥшь ихыҵуан 71 шықәса.

Сергеи Уасил-иԥа диит Џьгьарда ақыҭан. 10-атәи абжьаратә школ аҟны иҵара аныхиркәша, дҭалоит асубтропикатә нхамҩа аинститут агроном изанааҭ иоурц. Иҵара анаҩсгьы, Сергеи Уасил иԥа аинститут дҭанаҵы, аспорт гәцаракны иман. СССР ажәларқәа рспартакиада аан абаскетбол Аԥснытәи еизгоу акоманда капитанс даман. СССР аамҭа аан активла ихы алаирхәуан акомҿари акомпартиеи русура – акомҿар Аԥснытәи акомитет аинструктор иҟынтә Қырҭтәылатәи акомпартиа Уачамчыратәи Араионтә Комитет амаӡаныҟәгаҩ иҟнынӡа амҩа данысит.

Сергеи Багаԥшь наунагӡа Аԥсны аҭоурых данылеит, избанзар Аԥсны Ахадас дыҟанаҵы ҳҳәынҭқарра аҭоурых ҿыц аҟны раԥхьатәи азхаҵара аиуеит. 2008 шықәса, август 26 аҽны Урыстәылатәи Афедерациа Ахада Дмитри Медведев ирылеиҳәеит ҳтәылауаа акыр шықәса иззыԥшыз ақәҵара – Аԥсны Аҳәынҭқарра Ахьыԥшымра азхаҵара шаиуз ала. Анаҩс Аԥсны азхаҵара егьырҭ аҳәынҭқаррақәа жәпакы адгылеит.

Аԥсны аҳәынҭқарра аҭышәынтәалареи, уи жәларбжьара азхаҵареи рзы иааирԥшыз хәы змаӡам илагала ду азгәаҭо, 2011 шықәса, ииуль 6 рзы Сергеи Уасил-иԥа Багаԥшь ианашьан «Ахьӡ-Аԥша» Аорден I аҩаӡара.