Самсон Ҷанба ихьӡ зху Аԥсуа драматә театр аҳәаанырцәантәи арежиссиорцәа адрыԥхьалалоит. Абри атәы «Аԥсныпресс» иазеиҭеиҳәеит атеатр аиҳабы Алхас Ҷолокәуа.

«Аԥсуа драматә театр аусура аҳәаанырцәынтәи арежиссиорцәа радыԥхьалара гәҭакны иҳамоуп. Ари зегь рхы иадырхәо практиоуп. Уажәы атеатр акарантинтә аамҭала аус ауеит. Ҳара ҳрежиссиорцәагьы егьырҭ атеатрқәа рахь инарыԥхьар ҟалоит. Ҳҭагылазаашьа шаашьақәгылалак абри аганахь ала аусура ҳалагоит. 2022 шықәсазы еиҳа инарҭбааны ҳалацәажәар ҳалшоит», - иҳәеит Алхас Ҷолокәуа.

Адиректор хада иажәақәа рыла иахьазы атеатр аҿы 116-ҩык аус руеит, ԥшьҩык арежиссиорцәа ыҟоуп: Валери Ақаҩба, Адгур Ақаҩба, Мадина Аргәынԥҳа, Алхас Шамба.

Аҿкы инадҳәаланы акультуратә усҳәарҭақәа шаркәугьы, атеатр есыҽны аус ауеит иҳәеит Ҷолокәуа.

«Уажәазы ҩ-спектакльк ррепетициақәа мҩаԥысуеит: Мадина Аргәынԥҳа лықәыргыламҭа «Сариа», Нестор Лакоба иԥшәмаԥҳәыс илызкуп, Гудиса Ҭодуа иқәыргыламҭа аспектакль «Апринц хәыҷы», - еиҭеиҳәоит адиректор хада.

Иара убасгьы атеатр арепертуар аҿы иҟоу аспектакльқәа ррепетициақәа мҩаԥаагоит.

Ҷолокәуа иажәақәа рыла, Аԥсуа телехәаԥшра аспектакль «Ҳаҭыр зқәу Памела» ателеверсиа азнархиоит.