Диит 1956 шықәса декабр 1 аҽны Гагра араион Лӡаа ақыҭан. 1975 шықәсазы, абжьаратә школ даналга, дҭалоит Аҟәатәи аҵаралашаратә ҵараиурҭа. Анаҩс иҵара иациҵоит Москватәи аҳәынҭқарратә акультура аинститут аҟны.

Аинститут даналга дхынҳәуеит Аԥсныҟа. 1982-1983 шықәсқәа рзы аррамаҵура дахысуеит, Аҟәатәи арратә гарнизон иаҵанакуаз арратә оркестр дирижиорс даман. Еиуеиԥшым ашықәсқәа рзы Оҭар хәынҵариа Гагратәи амузыкатә школ диреқторс дыҟан, напхгара азиуан ашәаҳәареи акәашареи рансамбль «Абырфын». Аԥсны жәлыр рџьынџьтәылатә еибашьраан Оҭар Хәынҵариа деибашьуан Лӡаатәи арота далахәны.

2003 шықәса инаркны Оҭар Хәынҵариа аусура далагоит Аҟәатәи аҳәынҭқарратә акультура аҵараиурҭаҟны. Еиҿикаауеит адует «Абырфын», аквартет «Нан», Гагратәи ахәыҷтәы музыкатә театр «Мамзышьха».

Оҭар Хәынҵариа иԥсҭазаара иалагӡаны иҭижьит 15 музыкатә дискқәа, 150 ашәақәа инареиҳаны дравторуп, урҭ рхыԥхьаӡараҟны еицырдыруа ашәақәа – «Афырхацәа рашәа», «Аҿар ргимн», «Аҟәа азы ашәа», «Сыԥсадгьыл».

О. Хәынҵариа раԥхьатәи ахәыҷтәы аԥсуа опера-алакә «Нан» давторуп.