2005 шықәса рашәара 3 рзы Аԥсны Аҳәынҭқарра Ахада Сергеи Уасил-иԥа Багаԥшь инапы аҵаиҩит азакәан «Аԥсны Аҳәынҭқарра Азакәан «Аԥсны Аҳәынҭқарра агәаларшәаратә, аныҳәатә мшқәа ирызкны» ахарҭәаареи аԥсахреи алагара», уи ала ишьақәыргылоуп ԥхынгәы 23 Аԥсны Аҳәынҭқарратә Бираҟ иамшны.

Аԥсны Аҳәынҭқарра ҳаамҭазтәи Аҳәынҭқарратә бираҟ рыдыркылеит Аҟәа имҩаԥысуаз Аԥсны Ареспублика Иреиҳаӡоу Асовет Асессиаҟны 1992 шықәса, ԥхынгәы 23 рзы.

Аԥсны Аҳәынҭқарра абираҟ ашәага-загақәа – ауреи аҭбаареи 2:1 ҳәа аизыҟазаашьа рымоуп. Аш аураала аиаҵәеи ашкәакәа ҧшшәи рыла зҽеиҭнызыҧсахло ацәаҳәақәа ануп, урҭ рахьынтәи ԥшьба иаҵәоуп, хԥа – шкәакәоуп. Аиаҵәа ԥшшәы аԥсҭазаареи ақәыԥшреи ирсимволуп, ашкәакәа – адоуҳамч.

Анапы ахахьы иану хә-кәакьҭак змоу абыжьеҵәак Аԥсны аҭоурых дгьылқәа быжьба ирдыргоуп: Саӡтәыла, Бзыԥ, Гәыма, Абжьыуа, Самырзаҟан, Дал-Ҵабал, Ԥсҳәы-Аибӷа. Уи анаҩс, ахыԥхьаӡара «бжьба» аԥсуаа рзы, егьырҭ амилаҭқәа рзеиԥш, иԥшьоу аҵакы амоуп, инарҭбааны иарбоуп аԥсуаа рдинхаҵареи, рмифологиеи, итрадициатәу ркультуреи рҟны.

 Ишәыдаҳныҳәалоит Аԥсны Аҳәынҭқарра абираҟ амш!