Нурбеи Џьынџьал – Аԥсны зҽаԥсазтәыз Аҳәынҭқарратә жәлар рышәаҳәареи рыкәашареи рансамбль инарылукааша асолист. 1986 шықәсазы далгеит Аҟәатәи амузыкатә ҵараиурҭа. 1987 шықәса инаркны иахьа уажәраанӡа еиԥмырҟьаӡакәа аус иуеит Аҳәынҭқарратә жәлар рышәаҳәареи рыкәашареи рансамбль аҟны. Нурбеи Виқтор-иԥа иԥсҭазаара абжеиҳара ансамбль иадиҳәалеит, раԥхьатәи иконцерт мҩаԥигеижьҭеи 30 шықәса инареиҳаны иҵуеит. Имаҷым ашәаҳәаҩ иааирԥшыз алшарақәа. Дрылахәын ансамбль имҩаԥнагоз аконцертқәа ҳтәылаҟны еиԥш, иара убас аҳәаанырцәтәи агастрольқәа. Ансамбль асолист хада иаҳасаб ала аԥсуа шәаҳәаратә культура ӡыригоит, азыӡырҩцәа адиԥхьалоит.

Илшара дуқәа азгәаҭо, 2016 шықәсазы Нурбеи Џьынџьал ихҵан «Аԥсны жәлар рартист» ҳәа ахьӡ ҳаракы.

Ииубилеи идныҳәало, Нурбеи Виқтор-иԥа изеиӷьаҳшьоит агәабзиара, аманшәалара, ҩаԥхьагьы ақәҿиара дуқәа.

Шәҟазара абзиабаҩцәа шәрыгымзааит!