Аусмҩаԥгатә иалахәын Аԥсны Аҳәынҭқарра ахада Рауль Ҳыџьымба, Аҷыдалкаатә Азинмчызмоу Урыстәыла Ацҳаражәҳәаҩ Алеқсеи Двинианин, Аԥсны аԥыза-министр Валери Бганба, аиҳабыра, аҵарауаа, ашколхәыҷқәа.

Иури Воронов – еицырдыруа аҵарауаҩ-кавказҭҵааҩ, еицырдыруа аҳәынҭқарратә усзуҩы, амилаҭтә-хақәиҭратә қәԥара раԥхьагылаҩцәа дреиуоуп. Диит маи 8, 1941 шықәсазы Гәылрыԥшь араион Ҵабал ақыҭан. Аԥсны жәлар Рџьынџьтәылатә еибашьраан илшо зегь ҟаиҵон Урыстәылатәи амассатә хархәагақәа аинформациа иаша рызнагараз. Изныкымкәа ихы рылаирхәхьан аиҿцәажәарақәа. Аус иуан азакәанԥҵаратә, анагӡаратә системақәа рҟны. Дыршьит сентиабр 11, 1995 шықәсазы иҩны азааигәара. Иԥсыбаҩ амадоуп Аԥсуа ҳәынҭқарратә музеи аҿаԥхьа. Ихьӡ рхуп ашколқәа Аҟәеи Тҟәарчали, иара убас Аҟәатәи амҩадуқәа руак ихьӡ ахырҵеит. Иури Воронов ианашьоуп «Ахьӡ-Аԥша» Аорден I аҩаӡара, иара убас егьырҭ аҳәынҭқарратә ҳамҭақәа.