Апрель 22–28 рзы Адыгатәи Ареспубликаҟны имҩаԥысуеит Жәларбжьаратәи аԥсуа-адыга театрқәа рфестиваль «Кавказский меловой круг». Сынтәа ари афестиваль рхы аладырхәуеит Аԥсны Аҳәынҭқарра атеатртә коллективқәа: С. Ҷанба ихьӡ зху Аԥсуа ҳәынҭқарратә драматә театр, Аҳәынҭқарратә аҿар ртеатр.
«Кавказский меловой круг» – жәларбжьаратәи проектуп, ҵаҵӷәыс иамоуп Урыстәыла иқәынхо амилаҭ рацәа реидкылара, реинышәара. Афестиваль аҟны иарбанзаалак Кавказ, ма Аладатәи афедералтә округ ирыҵаркуа амилаҭтә театрқәа алшара рымоуп рхатәы бызшәала рҟазара ахәаԥшцәа дырбара.