Сентиабр 18 аҽны Искандер итеатр аҟны имҩаԥысит ашәҟәыҩҩы иҟазара иазку алитературатә хәылԥазы. Ахәылԥаз мҩаԥысит Алитературатә фестиваль "Риҵаҟны арифмақәа" аҳәаақәа ирҭагӡаны. Иалахәын Ҟабарда-Балкариа актиорцәа, иара убас Искандер итеатр актиорцәа.
"Фазиль Искандер иҟазара, иҩымҭақәа тема хадас ирыман еиуеиԥшым ажәларақәа, акультурақәа реигәныҩра. Уи ауп иара афестиваль атемасгьы изышьҭыхыз. Иҟалап, иара инарҭбааны акультуратә фестивальны ҳаԥхьаҟа иҟаларгьы. Ажәларқәа ркультура аиқәырхара иахьа адунеи аҿы имҩаԥысуа аглобалтә процессқәа рҿы ихадароуп. Ҩ-жәларык ркультуратә хаҭарнакцәа цоит иаауеит, аҟабардақәеи ҳареи лымкаала иҳабжьоуп аимадара, аха ари афестивальгьы даҽа цҳак ҳанаҭоит, иара иқәланы ицало иаало рацәаҩхоит", - ҳәа азгәалҭеит акультура аминистра Ельвира Арсалиаԥҳа.
Апроект "Риҵаҟны арифмақәа" аиҿкааҩ Зарина Ҟаныҟәа иазгәалҭеит, аԥсуа адыга ҳажәларқәа реимадара ҳаамҭазы аҿаргьы шадгылаз. Ихадоу ируакуп, урҭ аибабарахь ирымоу ргәазыҳәара адгылара, ридеиақәа рыцеиҩшара. Апроект "Риҵаҟны арифмақәа" аибабареи, аиҿцәажәарақәеи, аусеицуреи ирыцхраауа есышықәсатәи фестивальны иҟалароуп.