Аԥсны Аҳәынҭқарра аделегациа рхы аладырхәит маи 30 аҽны иаартыз XXI Жәларбжьаратәи афестиваль «Интермузеи – 2019».

Аделегациа хадара азылуеит Аԥсны Аҳәынҭқарра акультуреи аҭоурых-культуратә ҭынха ахьчареи рминистр Ельвира Арсалиаԥҳа. Иара убас аделегациа иалахәуп акультура аминистр лхаҭыԥуаҩ Баҭал Кәабахьиа, Дырмит Гәлиа илитературатә-мемориалтә ҩны-амузеи аиҳабы Светлана Қәарсаииаԥҳа, амузеи аусзуҩцәа.

Афестиваль рхы аладырхәуеит Дырмит Гәлиа илитературатә-мемориалтә ҩны-амузеи. Ацәыргақәҵа темас иамоуп: «Аԥсуа шәҟәыҩҩцәеи аурыс шәҟәыҩҩцәеи ркультуратә еимадара».

«Интермузеи» – адунеи аҟны зегьы иреҳаӡоу амузеитә форумуп. Араҟа еиԥылоит еиуеиԥшым аҳәынҭаррақәа рҟынтә апрофессионалцәа. Аԥсны Аҳәынҭқарра Акультуреи аҭоурых-культуратә ҭынха ахьчареи рминистрреи Урыстәылатәи Афедерациа Акультура аминистрреи русеицураз ауснагатәқәа инарықәыршәаны, Аԥсны ахаҭарнакцәа изныкымкәа «Интермузеи» рхы аладырхәхьеит. Дырмит Гәлиа илитературатә-мемориалтә ҩны-амузеи иахьатәи рцәыргақәҵа тема хадас иамоуп XX ашәышықәсазы аԥсуа шәҟәыҩҩцәеи аурыс шәҟәыҩҩцәеи ркультуратә еимадарақәа. Агәра ганы ҳаҟоуп, «Интермузеи» аҟны аҿыц еибадыррақәа, аԥышәа еимадарақәа, апрофессионалцәа рыҿцәажәара амузеиқәа рыҿиара аус иацхраауеит ҳәа», – азгәалҭеит акультура аминистр Ельвира Арсалиаԥҳа.

Афестиваль «Интермузеи» мҩаԥысуеит ииун 2 аҽнынӡа.